កាណាដា៖ ប្រទេសកាណាដានឹងដាក់ចេញនូវវិធានការអន្តោប្រវេសន៍ថ្មី ដើម្បីគាំទ្រអ្នកស្នាក់នៅបណ្តោះអាសន្នរបស់ស៊ូដង់ ដែលបច្ចុប្បន្នកំពុងស្ថិតនៅក្នុងប្រទេសកាណាដា ហើយប្រហែលជាមិនអាចត្រឡប់ទៅផ្ទះវិញបាន ដោយសារស្ថានភាពកាន់តែយ៉ាប់យ៉ឺនដែលវិវត្តន៍យ៉ាងឆាប់រហ័សនៅក្នុងប្រទេសស៊ូដង់។ នេះបើយោងតាមសេចក្តីប្រកាសរបស់រដ្ឋាភិបាលកាណាដាកាលពីថ្ងៃចន្ទ ទី២៤ ខែមេសាម្សិលមិញនេះ។

គួរបញ្ជាក់ថា ការប្រយុទ្ធគ្នាបានផ្ទុះឡើងរវាងកងកម្លាំងប្រដាប់អាវុធរបស់ប្រទេសស៊ូដង់ និងក្រុមទាហានប៉ារ៉ា Rapid Support Forces (RSF) កាលពីថ្ងៃទី១៥ ខែមេសា ហើយបានសម្លាប់មនុស្សរាប់រយនាក់ បំផ្លាញមន្ទីរពេទ្យ និងសេវាកម្មផ្សេងទៀត ហើយបានប្រែក្លាយតំបន់លំនៅដ្ឋានទៅជាតំបន់សង្គ្រាមផងដែរ។ 

រដ្ឋាភិបាលកាណាដាបាននិយាយនៅក្នុងសេចក្តីថ្លែងការណ៍ថា នៅពេលដែលវិធានការថ្មីរបស់ប្រទេសកាណាដាបានប្រកាសដោយរដ្ឋមន្ត្រីអន្តោប្រវេសន៍កាណាដាលោក Sean Fraser នោះជនជាតិស៊ូដង់អាចដាក់ពាក្យសុំបន្តឋានៈរបស់ពួកគេនៅក្នុងប្រទេសកាណាដា និងផ្លាស់ទីរវាងចរន្តបណ្តោះអាសន្ន ដោយអនុញ្ញាតឱ្យពួកគេបន្តការសិក្សា ធ្វើការ ឬទៅលេងគ្រួសារដោយមិនគិតថ្លៃ។ ដើម្បីជួយសម្រួលដល់ការដាក់ពាក្យសុំអន្តោប្រវេសន៍សម្រាប់អ្នកដែលកំពុងបន្តស្ថិតនៅក្នុងប្រទេសស៊ូដង់ រដ្ឋាភិបាលកាណាដាបញ្ជាក់ថា ខ្លួនក៏នឹងផ្តល់អាទិភាពដល់ដំណើរការដែលបានបញ្ចប់ពាក្យសុំស្នាក់នៅបណ្តោះអាសន្ន និងអចិន្ត្រៃយ៍ដែលមាននៅក្នុងប្រព័ន្ធរួចហើយពីអ្នកដាក់ពាក្យសុំដែលកំពុងនៅក្នុងប្រទេសស៊ូដង់។ មិនត្រឹមតែប៉ុណ្ណោះ ការអនុញ្ញាតនេះក៏នឹងធ្វើឡើងរួមបញ្ចូលទាំងពាក្យសុំទិដ្ឋាការ សម្រាប់សមាជិកគ្រួសារដែលមានសិទ្ធិទទួលបានសញ្ជាតិកាណាដា និងអ្នករស់នៅអចិន្ត្រៃយ៍របស់កាណាដា។

រដ្ឋាភិបាលកាណាដាក៏បានបញ្ជាក់ថា ខ្លួនក៏នឹងលើកលែងថ្លៃលិខិតឆ្លងដែន និងឯកសារធ្វើដំណើរអចិន្ត្រៃយ៍សម្រាប់ពលរដ្ឋ និងអ្នករស់នៅអចិន្ត្រៃយ៍នៃប្រទេសកាណាដាដែលកំពុងមានវត្តមានក្នុងប្រទេសស៊ូដង់ហើយមានបំណងចង់ចាកចេញពីប្រទេសដែលកំពុងមានសង្គ្រាមនេះ។ សហរដ្ឋអាមេរិកបាននិយាយកាលពីថ្ងៃច័ន្ទថា ក្រុមបក្សពួកដែលកំពុងធ្វើសង្គ្រាមនៅស៊ូដង់បានយល់ព្រមលើបទឈប់បាញ់ដែលមានរយៈពេល ៧២ម៉ោង ខណៈដែលប្រទេសលោកខាងលិច អារ៉ាប់ និងអាស៊ីបានប្រជែងគ្នាដើម្បីទាញយក​ប្រជាពលរដ្ឋរបស់ស៊ូដង់។

ប្រទេសកាណាដាក៏បាននិយាយកាលពីថ្ងៃអាទិត្យថា ខ្លួនបានផ្អាកប្រតិបត្តិការជាបណ្តោះអាសន្ននៅក្នុងប្រទេសស៊ូដង់ ហើយអ្នកការទូតកាណាដានឹងធ្វើការជាបណ្តោះអាសន្នពីទីតាំងដែលមានសុវត្ថិភាពនៅខាងក្រៅប្រទេស៕